Sapo vjen vera ajo që të gjithë duam është të planifikojmë pushimet & fundjavat buzë detit. Vera na lidh më shumë me natyrën dhe bukuritë që ajo ofron. Presim me padurim të relaksohemi, të shijojmë në maksimum pamjen, detin dhe diellin, por është e rëndësishmë të kujdesemi që të qendrojmë të sigurt dhe të shëndetshëm, ku përveç kujdesit për organizimin në tërësi, një kujdes të veçantë duhet t’i kushtojmë lëkurës.Gjatë pushimeve duam të dukemi bukur dhe të rrezatojmë.
Ndaj, përgatitja e valixhes që do merrni me vete duhet bërë me shumë kujdes. Ajo nuk duhet të përmbajë vetëm rroba banje, fustane por edhe produkte dermokozmetike, të nevojshme për një lëkurë të shëndetshme gjatë plazhit.Nëse nuk e keni idenë se cilat produkte ju duhen, nëse zgjedhja e vetëm disa produkteve ju tremb ose dhe nëse thjesht jeni dembelë dhe nuk keni dëshirë të merreni me këtë punë….mos u shqetësoni. Ne do t’ju vijmë në ndihmë. Më poshtë do listojmë disa produkte dermokozmetike të rëndësishme për përkujdesjen e lëkurës që duhet medoemos t’i keni me vete. Pushimet tuaja do të jenë të paharrueshme.
Produktet që mbrojnë nga rrezatimi diellor
Janë produktet më të rëndësishme, pavarësisht moshës apo llojit të lëkurës. Rrezatimi mund të shkaktojë dëme të mëdha në lëkurë (skuqje, djegie & irritim të lëkurës, njolla të errëta, plakje të lëkurës, kancer të lëkurës). Përdorimi i produkteve mbrojtëse me SPF, për fytyrën dhe trupin duhet të jetë pjesë e rutinës suaj gjatë pushimeve.
Produktet me SPF janë të ndryshme dhe klasifikohen bazuar në kriteret e mëposhtme.
Produktet me filtra kimikë janë më të përdorur. Ata kanë veti të absorbojnë rrezatimin UV përpara se të arrijë lëkurën dhe nuk e lenë të bardhë zonën ku aplikohen.
Filtrat fizikë kanë veti që të reflektojnë rrezatimin UV. Ata janë pak më të vështirë për t’u përhapur dhe e lenë të bardhë zonën ku aplikohen.
Produktet me SPF duhet të aplikohen të paktën 15 minuta para ekspozimit në diell dhe duhet të riaplikohen çdo 2-3 orë sipas nevojës.
Produkte dermokozmetike që përshpejtojnë nxirjen
Janë shumë të preferuara gjatë verës. Të gjithë kërkojnë një nxirje të shpejtë për të arritur ngjyrën e bronxtë uniforme. Por, ajo që na shqetëson të gjithëve është si të nxihemi shpejt pa u djegur?
Sigurisht që produktet me SPF nuk duhet t’i neglizhoni. Mospërdorimi i tyre nuk nënkupton nxirje por djegie. Shtojini çantës tuaj produkte dermokozmetike që intensifikojnë ngjyrën e lëkurës, duke nxitur prodhimin e melaninës dhe ju ndihmojnë të arrini dhe të mbani më gjatë ngjyrën e dëshiruar.
Uji termal
Është ndër të paktët produkte kozmetike që mund të përdoret çdo ditë dhe madje disa herë në ditë. Ka veti hidratuese dhe qetëson irritimet e lëkurës. Askush nuk do të ketë një lëkurë të dehidratuar, çka mund të ndodhë nëse nuk kujdesemi siç duhet për lëkurën. Uji termal në sajë të vetive antioksiduese mbron nga radikalët e lirë dhe i ofron lëkurës një ndjesi rehatie dhe komforti. I përshtatshëm për të gjithë familjen. Pikërisht për këto arsye uji termal duhet të jetë pjesë e “çantës suaj të plazhit”. Cilado qoftë firma që keni zgjedhur nuk ka rëndësi, cilësia është e garantuar.
Produktet pas diellit
Ditët gjatë verës janë të gjata. Pas orësh të tëra në plazh duke marrë rreze kemi nevojë për një produkt që të ruajë shkëlqimin e lëkurës sonë dhe pasi ka ikur dielli. After sun është një term që përdoret për produkte që kanë veti të hidratojnë, ushqejnë dhe zbusin lëkurën, subjekt të një stresi oksidativ të shkaktuar nga rrezatimi UV.
Sytë & buzët
Sytë dhe buzët janë zona tepër delikate. Shpeshherë si pasojë e ekspozimit për një kohë të gjatë në diell thahen, çahen dhe rripen, nëse nuk hidratohen siç duhet.
Merrni me vete një zbutës për buzët me mbrojtje ndaj diellit.
Nëse keni zona të cilat kërkojnë mbrojtje të shtuar ndaj diellit (nishane, zona të ndjeshme të trupit) mund të shtoni edhe stik mbrojtës ndaj diellit.
Produktet dermokozmetike për flokët
Të fundit por jo për nga rëndësia janë produktet për flokët.
Flokët e shëndetshëm dhe me shkëlqim na japin një pamje tjetër. Kombinimi i nxehtësisë me rërën, kripën dhe klorin është shumë i dëmshëm për flokët. Gjatë ekspozimit në diell, nga uji i kripur apo uji i pishinës flokët dëmtohen dhe mund të pësojnë:
- humbje të hidratimit;
- krijimin e majave të flokëve të thata dhe të dëmtuara;
- zbehje të ngjyrës së flokëve.
Ndaj në produktet e e nevojshme gjatë pushimeve nuk duhet të mungojnë ata të kujdesit për flokët.
Tashmë keni gjithçka që ju duhet.
Ajo që ju mbetet është të kaloni sa më këndshëm, të buzëqeshni dhe të bëni sa më shumë foto.
Ne ju urojmë pushime të këndshme.
Ndoshta mund t’ju interesojnë edhe artikujt e mëposhtëm:
